ان گنت ہیں یہاں مہرباں دیکھیے

ان گنت ہیں یہاں مہرباں دیکھیے

کون دے گا مگر اپنی جاں دیکھیے

کس طرح دریا بنتا ہے قطرہ کوئی

جاننا ہے تو آب رواں دیکھیے

خاک تیرا مکاں بھی تو جل کر ہوا

نفرتوں کا اٹھا ہے دھواں دیکھیے

آپ کی حیثیت سوکھے پتے سی ہے

ٹھوکریں کھا رہے ہیں یہاں دیکھیے

اس کے چہرے پہ ہے فکر ہر دم عیاں

گھر میں بیٹی ہے جس کے جواں دیکھیے

آج نا حق بہے گا کسی کا لہو

دست ظالم میں تیر و کماں دیکھیے

شاید ایسی جگہ کوئی تم کو ملے

جھک گیا ہو جہاں آسماں دیکھیے

جو وطن کی تباہی کا باعث رہے

لکھ رہے ہیں وہی داستاں دیکھیے

مل گئی جب بھی عاطفؔ ہوا کی مدد

آگ پہنچی کہاں سے کہاں دیکھیے