ana jab san chaDhti hai to jazbe kaT deti hai

anā jab saan chaḌhtī hai to jazbe kaaT detī hai

diloñ meñ jab utar jaatī hai rishte kaaT detī hai

jalā detī hai ulfat kī vafā kī saarī tāmīreñ

havas kī aag barsoñ ke taqāze kaaT detī hai

muqarrir dil-nashīñ lahja bhī apnā.e to kyā kahnā

zarā sī baat logoñ ke kaleje kaaT detī hai

adālat kī kasauTī par kasā jaatā hai jab mujrim

qalam kī ek jumbish saare hiile kaaT detī hai

hamārā hausla hī kāmyābī kī zamānat hai

nadī chaḌh jaa.e to donoñ kināre kaaT detī hai

mahārat bhī agar ho jaa.e shāmil jazb-e-sādiq meñ

to patlī Dor bhī mazbūt dhāge kaaT detī hai

nahīñ kam-mā.egī kuchh bā.is-e-tahqīr ai 'anjum'

kanī hiire kī chaltī hai to shīshe kaaT detī hai

ana jab san chaDhti hai to jazbe kaT deti hai

dilon mein jab utar jati hai rishte kaT deti hai

jala deti hai ulfat ki wafa ki sari tamiren

hawas ki aag barson ke taqaze kaT deti hai

muqarrir dil-nashin lahja bhi apnae to kya kahna

zara si baat logon ke kaleje kaT deti hai

adalat ki kasauTi par kasa jata hai jab mujrim

qalam ki ek jumbish sare hile kaT deti hai

hamara hausla hi kaamyabi ki zamanat hai

nadi chaDh jae to donon kinare kaT deti hai

mahaarat bhi agar ho jae shamil jazb-e-sadiq mein

to patli Dor bhi mazbut dhage kaT deti hai

nahin kam-maegi kuchh bais-e-tahqir ai 'anjum'

kani hire ki chalti hai to shishe kaT deti hai