ana ko apne hi hathon se qatl kar jata

anā ko apne hī hāthoñ se qatl kar jaatā

agar maiñ TuuT na jaatā bikhar bikhar jaatā

mirī talāsh meñ niklī thī āftāb kī fauj

jo maiñ guphā se nikaltā to aaj mar jaatā

maiñ jaan kar nazar-andāz kar gayā varna

tirā libās sar-e-anjuman utar jaatā

kahīñ se koī kiran hī na aa sakī varna

ye tīrgī kā khañDar raushnī se bhar jaatā

zamīn hī mirā rasta zamīn hī manzil

zamīn chhoḌ ke jaatā to maiñ kidhar jaatā

vahāñ to ḳhud hī chaTaḳhne lagī haiñ dīvāreñ

agar vo aa.ina bante to maiñ sañvar jaatā

kuchh itne zor kā aayā thā zalzala kal raat

agar maiñ jaag na jaatā to ḳhvāb mar jaatā

kisī kā qarz hai mujh par ye jāntā huuñ magar

koī gavāh na hotā to maiñ mukar jaatā

ana ko apne hi hathon se qatl kar jata

agar main TuT na jata bikhar bikhar jata

meri talash mein nikli thi aaftab ki fauj

jo main gupha se nikalta to aaj mar jata

main jaan kar nazar-andaz kar gaya warna

tera libas sar-e-anjuman utar jata

kahin se koi kiran hi na aa saki warna

ye tirgi ka khanDar raushni se bhar jata

zamin hi mera rasta zamin hi manzil

zamin chhoD ke jata to main kidhar jata

wahan to KHud hi chaTaKHne lagi hain diwaren

agar wo aaina bante to main sanwar jata

kuchh itne zor ka aaya tha zalzala kal raat

agar main jag na jata to KHwab mar jata

kisi ka qarz hai mujh par ye jaanta hun magar

koi gawah na hota to main mukar jata