ananiyat ko kabhi ham-zaban kiya hi nahin

anāniyat ko kabhī ham-zabāñ kiyā hī nahīñ

ḳhudī pe dosto ham ne gumāñ kiyā hī nahīñ

safar hayāt kā ham ne girāñ kiyā hī nahīñ

farebiyoñ ko kabhī ham-ināñ kiyā hī nahīñ

kisī pe kaise ayaañ hotī dil kī kaifiyyat

ki rāz-e-dil to kisī se bayāñ kiyā hī nahīñ

añdheroñ meñ rahe par māñge ke ujāloñ se

ghar apnā ham ne kabhī zau-fishāñ kiyā hī nahīñ

idhar kī baat udhar aur udhar kī baat idhar

ye mashġhala kabhī ham ne miyāñ kiyā hī nahīñ

darūn-e-zāt meñ jaane ye pal ga.iiñ kaise

in ārzūoñ ko ham ne javāñ kiyā hī nahīñ

mileñgī ashk kī sauġhāt is liye ham ne

ai 'shād' ishq meñ jī kā ziyāñ kiyā hī nahīñ

ananiyat ko kabhi ham-zaban kiya hi nahin

KHudi pe dosto hum ne guman kiya hi nahin

safar hayat ka hum ne giran kiya hi nahin

farebiyon ko kabhi ham-inan kiya hi nahin

kisi pe kaise ayan hoti dil ki kaifiyyat

ki raaz-e-dil to kisi se bayan kiya hi nahin

andheron mein rahe par mange ke ujalon se

ghar apna hum ne kabhi zau-fishan kiya hi nahin

idhar ki baat udhar aur udhar ki baat idhar

ye mashghala kabhi hum ne miyan kiya hi nahin

darun-e-zat mein jaane ye pal gain kaise

in aarzuon ko hum ne jawan kiya hi nahin

milengi ashk ki saughat is liye hum ne

ai 'shad' ishq mein ji ka ziyan kiya hi nahin