andaz-e-suKHan maslahat-amez bahut hai

andāz-e-suḳhan maslahat-āmez bahut hai

phir bhī ye adā terī dil-āvez bahut hai

āshufta-mizājī pe mirī tanz na kiije

andāz-e-jahāñ bhī to junūñ-ḳhez bahut hai

ham se vo milā hai to khule dil se milā hai

duniyā ko shikāyat hai kam-āmez bahut hai

ham us se judā ho ke bhī yuuñ jhuum rahe haiñ

jaise ki ye lamha bhī tarab-ḳhez bahut hai

ik baar bhī tharrā.ī na lau sham-e-vafā kī

sunte the zamāne kī havā tez bahut hai

tum abr-e-karam ban ke zarā aa ke to dekho

ḳhāk-e-dil-e-barbād bhī zarḳhez bahut hai

kuchh aur shikāyat to nahīñ terī nazar se

ye baat alag hai ki zarā tez bahut hai

ab dekhiye kis rañg meñ ye shaam Dhalegī

kuchh gardish-e-hālāt kī lai tez bahut hai

andaz-e-suKHan maslahat-amez bahut hai

phir bhi ye ada teri dil-awez bahut hai

aashufta-mizaji pe meri tanz na kije

andaz-e-jahan bhi to junun-KHez bahut hai

hum se wo mila hai to khule dil se mila hai

duniya ko shikayat hai kam-amez bahut hai

hum us se juda ho ke bhi yun jhum rahe hain

jaise ki ye lamha bhi tarab-KHez bahut hai

ek bar bhi tharrai na lau sham-e-wafa ki

sunte the zamane ki hawa tez bahut hai

tum abr-e-karam ban ke zara aa ke to dekho

KHak-e-dil-e-barbaad bhi zarKHez bahut hai

kuchh aur shikayat to nahin teri nazar se

ye baat alag hai ki zara tez bahut hai

ab dekhiye kis rang mein ye sham Dhalegi

kuchh gardish-e-haalat ki lai tez bahut hai