andaz kuchh aur naz-o-ada aur hi kuchh hai

andāz kuchh aur nāz-o-adā aur hī kuchh hai

jo baat hai vo nām-e-ḳhudā aur hī kuchh hai

na barq na ḳhurshīd na sho.ala na bhabhūkā

kyuuñ sāhibo ye husn hai yā aur hī kuchh hai

billor kī chamkeñ haiñ na almās kī jhamkeñ

us gore se siine kī safā aur hī kuchh hai

pīchhe ko nazar kī to vo guddī hai qayāmat

aage ko jo dekhā to gilā aur hī kuchh hai

siine pe kahā maiñ ne ye do seb haiñ kyā haiñ

sharmā ke ye chupke se kahā aur hī kuchh hai

tum bāteñ hameñ kahte ho aur sunte haiñ ham chup

apnī bhī ḳhamoshī meñ sadā aur hī kuchh hai

haiñ aap kī bāteñ to shakar-rez par ai jaañ

is gūñge ke guḌ meñ bhī mazā aur hī kuchh hai

pūchhī jo davā ham ne tabīboñ se to bole

bīmārī nahīñ hai ye balā aur hī kuchh hai

unnāb na ḳhutmī na banafsha na ḳhiyārīn

is Dhab ke marīzoñ kī davā aur hī kuchh hai

ham ko to 'nazīr' un se shikāyat hai jafā kī

aur un kā jo suniye to gila aur hī kuchh hai

andaz kuchh aur naz-o-ada aur hi kuchh hai

jo baat hai wo nam-e-KHuda aur hi kuchh hai

na barq na KHurshid na shoala na bhabhuka

kyun sahibo ye husn hai ya aur hi kuchh hai

billor ki chamken hain na almas ki jhamken

us gore se sine ki safa aur hi kuchh hai

pichhe ko nazar ki to wo guddi hai qayamat

aage ko jo dekha to gila aur hi kuchh hai

sine pe kaha main ne ye do seb hain kya hain

sharma ke ye chupke se kaha aur hi kuchh hai

tum baaten hamein kahte ho aur sunte hain hum chup

apni bhi KHamoshi mein sada aur hi kuchh hai

hain aap ki baaten to shakar-rez par ai jaan

is gunge ke guD mein bhi maza aur hi kuchh hai

puchhi jo dawa hum ne tabibon se to bole

bimari nahin hai ye bala aur hi kuchh hai

unnab na KHutmi na banafsha na KHiyarin

is Dhab ke marizon ki dawa aur hi kuchh hai

hum ko to 'nazir' un se shikayat hai jafa ki

aur un ka jo suniye to gila aur hi kuchh hai