andar ka saya-dar shajar KHwab ho gaya

andar kā sāya-dār shajar ḳhvāb ho gayā

qismat jo aaḌe aa.ī hunar ḳhvāb ho gayā

ghar se sajā ke ḳhvāb vo aayā thā shahr meñ

puurā huā jo ḳhvāb to ghar ḳhvāb ho gayā

har phuul taar taar hai har ġhuncha zaar zaar

ujḌī huī bahār sā har ḳhvāb ho gayā

sab ‘azmateñ tumhārī ḳhayālāt ho ga.iiñ

kyā hogā hashr qasr agar ḳhvāb ho gayā

aisī ḳhatā pe mujh ko sazā milnī chāhiye

kaise bhalā ḳhilāf-e-sahar ḳhvāb ho gayā

majnūñ kā ruup dhaar ke sahrā-e-zīst meñ

puurī tarah se ḳhāk-basar ḳhvāb ho gayā

mujh se na pūchiyegā bichhaḌ jaane kā sabab

bas itnā jāntā huuñ qamar ḳhvāb ho gayā

'zāhid' jahān-e-hirs-o-havas kyā jahān hai

hairān huuñ ki ḳhvāb ke sar ḳhvāb ho gayā

andar ka saya-dar shajar KHwab ho gaya

qismat jo aaDe aai hunar KHwab ho gaya

ghar se saja ke KHwab wo aaya tha shahr mein

pura hua jo KHwab to ghar KHwab ho gaya

har phul tar tar hai har ghuncha zar zar

ujDi hui bahaar sa har KHwab ho gaya

sab ‘azmaten tumhaari KHayalat ho gain

kya hoga hashr qasr agar KHwab ho gaya

aisi KHata pe mujh ko saza milni chahiye

kaise bhala KHilaf-e-sahar KHwab ho gaya

majnun ka rup dhaar ke sahra-e-zist mein

puri tarah se KHak-basar KHwab ho gaya

mujh se na puchiyega bichhaD jaane ka sabab

bas itna jaanta hun qamar KHwab ho gaya

'zahid' jahan-e-hirs-o-hawas kya jahan hai

hairan hun ki KHwab ke sar KHwab ho gaya