اندیشۂ عمل نہ خیال نجات ہے

اندیشۂ عمل نہ خیال نجات ہے

صبح حرم سے مست جوانی کی رات ہے

دل کی اگر بقا تو نظر کا ثبات ہے

آنسو جو مستجاب ہو آب حیات ہے

طوفان عام زلزلۂ کائنات ہے

کیا زندگی مریض محبت کی رات ہے

فکر نشیمن و غم گل سے نجات ہے

بجلی مرے لئے نگہ التفات ہے

وہ اک نظر کہ جائزۂ دل نہ لے سکے

کیا فائدہ جو ممتحن کائنات ہے

ماتم نہ کیوں کروں دل ساحل نصیب کا

اس بحر زندگی میں تلاطم حیات ہے

یہ امتیاز وحدت و کثرت بجا سہی

لیکن قیام ذات بہ قید صفات ہے

اہل چمن نگاہ رکھیں انقلاب پر

رنگ خزاں بھی گل کی طرح بے ثبات ہے

گلشن میں فیضؔ مسئلۂ رنگ و بو نہ چھیڑ

یہ امتیاز قلب و نظر کی وفات ہے