andesha-e-amal na KHayal-e-najat hai

andesha-e-amal na ḳhayāl-e-najāt hai

sub.h-e-haram se mast javānī kī raat hai

dil kī agar baqā to nazar kā sabāt hai

aañsū jo mustajāb ho āb-e-hayāt hai

tūfān-e-ām zalzala-e-kā.enāt hai

kyā zindagī marīz-e-mohabbat kī raat hai

fikr-e-nasheman-o-ġham-e-gul se najāt hai

bijlī mire liye nigah-e-iltifāt hai

vo ik nazar ki jā.eza-e-dil na le sake

kyā fā.eda jo mumtahin-e-kā.enāt hai

mātam na kyoñ karūñ dil-e-sāhil-nasīb kā

is bahr-e-zindagī meñ talātum hayāt hai

ye imtiyāz-e-vahdat-o-kasrat bajā sahī

lekin qiyām-e-zāt ba-qaid-e-sifāt hai

ahl-e-chaman nigāh rakheñ inqalāb par

rang-e-ḳhizāñ bhī gul kī tarah be-sabāt hai

gulshan meñ 'faiz' mas.ala-e-rang-o-bū na chheḌ

ye imtiyāz-e-qalb-o-nazar kī vafāt hai

andesha-e-amal na KHayal-e-najat hai

subh-e-haram se mast jawani ki raat hai

dil ki agar baqa to nazar ka sabaat hai

aansu jo mustajab ho aab-e-hayat hai

tufan-e-am zalzala-e-kaenat hai

kya zindagi mariz-e-mohabbat ki raat hai

fikr-e-nasheman-o-gham-e-gul se najat hai

bijli mere liye nigah-e-iltifat hai

wo ek nazar ki jaeza-e-dil na le sake

kya faeda jo mumtahin-e-kaenat hai

matam na kyon karun dil-e-sahil-nasib ka

is bahr-e-zindagi mein talatum hayat hai

ye imtiyaz-e-wahdat-o-kasrat baja sahi

lekin qiyam-e-zat ba-qaid-e-sifat hai

ahl-e-chaman nigah rakhen inqalab par

rang-e-KHizan bhi gul ki tarah be-sabaat hai

gulshan mein 'faiz' masala-e-rang-o-bu na chheD

ye imtiyaz-e-qalb-o-nazar ki wafat hai