اندیشہ ہائے سود و زیاں تک نہ آ سکے

اندیشہ ہائے سود و زیاں تک نہ آ سکے

ہم جس جگہ تھے لوگ وہاں تک نہ آ سکے

کیا جانیے بھٹکتے پھریں گے کہاں کہاں

وہ حادثے جو میرے مکاں تک نہ آ سکے

جتنا وفا کا پاس تھا اتنا ہی اجتناب

وہ راز تھے جو وہم و گماں تک نہ آ سکے

ہم تو سجائے بیٹھے تھے محفل خیال کی

کیا کیجئے کہ لوگ یہاں تک نہ آ سکے

انداز گفتگو میں رہے اتنی احتیاط

احساس کرب لفظ و بیاں تک نہ آ سکے

چاہا تھا اپنے حال پہ کچھ تبصرہ کریں

لیکن بہت سے لفظ زباں تک نہ آ سکے

کس راستے سے آئے ضیاؔ تم ہمارے پاس

ہم تو وہاں تھے کوئی جہاں تک نہ آ سکے