andesha-ha-e-sud-o-ziyan tak na aa sake

andesha-hā-e-sūd-o-ziyāñ tak na aa sake

ham jis jagah the log vahāñ tak na aa sake

kyā jāniye bhaTakte phireñge kahāñ kahāñ

vo hādse jo mere makāñ tak na aa sake

jitnā vafā kā paas thā utnā hī ijtināb

vo raaz the jo vahm-o-gumāñ tak na aa sake

ham to sajā.e baiThe the mahfil ḳhayāl kī

kyā kījiye ki log yahāñ tak na aa sake

andāz-e-guftugū meñ rahe itnī ehtiyāt

ehsās-e-karb lafz-o-bayāñ tak na aa sake

chāhā thā apne haal pe kuchh tabsira kareñ

lekin bahut se lafz zabāñ tak na aa sake

kis rāste se aa.e 'ziyā' tum hamāre paas

ham to vahāñ the koī jahāñ tak na aa sake

andesha-ha-e-sud-o-ziyan tak na aa sake

hum jis jagah the log wahan tak na aa sake

kya jaaniye bhaTakte phirenge kahan kahan

wo hadse jo mere makan tak na aa sake

jitna wafa ka pas tha utna hi ijtinab

wo raaz the jo wahm-o-guman tak na aa sake

hum to sajae baiThe the mahfil KHayal ki

kya kijiye ki log yahan tak na aa sake

andaz-e-guftugu mein rahe itni ehtiyat

ehsas-e-karb lafz-o-bayan tak na aa sake

chaha tha apne haal pe kuchh tabsira karen

lekin bahut se lafz zaban tak na aa sake

kis raste se aae 'ziya' tum hamare pas

hum to wahan the koi jahan tak na aa sake