andher-nagri ke shahzado ye raat bas ek do ghaDi hai

andher-nagrī ke shāhzādo ye raat bas ek do ghaḌī hai

diloñ ke ghaav chamak uThe haiñ lahū kī naddī ubal paḌī hai

tum is ko qismat kī baat jaano ise muqaddar kā khel samjho

hidāyateñ ahmaqoñ se lenā ye āzmā.ish bahut kaḌī hai

tumhāre qabze meñ dukh hī dukh haiñ magar suno maut ke farishto

hamārī jholī meñ zindagī hai jo sab dukhoñ se bahut baḌī hai

hamārī āñkhoñ meñ āñkheñ Daalo to jaan loge ki apnī baazī

zamīn kī bedād se Thanī hai falak kī raftār se laḌī hai

shahr shahr jashn kā samāñ hai vo maut kā raqs ho rahā hai

ufuq pe aise anaar chalte haiñ jaise barsāt kī jhaḌī hai

lahū ko barsātī haiñ jo āñkheñ ab un se sho.ale nikal rahe haiñ

hamārī duniyā ye lag rahā hai kisī na.e moḌ par khaḌī hai

tumhārī ḳhātir na-jāne kab kī hameñ to me.arāj mil chukī hai

jo ham uThā kar salīb laa.e the ab tumhāre liye gaḌī hai

andher-nagri ke shahzado ye raat bas ek do ghaDi hai

dilon ke ghaw chamak uThe hain lahu ki naddi ubal paDi hai

tum is ko qismat ki baat jaano ise muqaddar ka khel samjho

hidayaten ahmaqon se lena ye aazmaish bahut kaDi hai

tumhaare qabze mein dukh hi dukh hain magar suno maut ke farishto

hamari jholi mein zindagi hai jo sab dukhon se bahut baDi hai

hamari aankhon mein aankhen Dalo to jaan loge ki apni bazi

zamin ki bedad se Thani hai falak ki raftar se laDi hai

shahr shahr jashn ka saman hai wo maut ka raqs ho raha hai

ufuq pe aise anar chalte hain jaise barsat ki jhaDi hai

lahu ko barsati hain jo aankhen ab un se shoale nikal rahe hain

hamari duniya ye lag raha hai kisi nae moD par khaDi hai

tumhaari KHatir na-jaane kab ki hamein to mearaj mil chuki hai

jo hum uTha kar salib lae the ab tumhaare liye gaDi hai