andhera raat ka is waqt buDha hone wala hai

añdherā raat kā is vaqt būḌhā hone vaalā hai

darīche khol kar dekho saverā hone vaalā hai

bikherā hai falak ne zāfrānī rañg dhartī par

daraḳhtoñ kā har ik pattā sunahrā hone vaalā hai

vo apnī dastaras se ab mujhe āzād kar degā

amīr-e-shahr ke hāthoñ ujālā hone vaalā hai

havelī kā har ik gosha gulāboñ se mahaktā hai

kisī mazlūm kī aahoñ kā saudā hone vaalā hai

parinde ghoñsloñ kī laaT meñ jo sahme baiThe haiñ

kisī tūfāñ kī aamad hai añdherā hone vaalā hai

vo merī shaḳhsiyat par ab karegā tabsira shāyad

mire afkār ke rañgoñ kā charchā hone vaalā hai

badan meñ ḳhuun kī ik buuñd bhī baaqī nahīñ 'arshad'

mirī saf meñ raqīboñ kā izāfa hone vaalā hai

andhera raat ka is waqt buDha hone wala hai

dariche khol kar dekho sawera hone wala hai

bikhera hai falak ne zafrani rang dharti par

daraKHton ka har ek patta sunahra hone wala hai

wo apni dastaras se ab mujhe aazad kar dega

amir-e-shahr ke hathon ujala hone wala hai

haweli ka har ek gosha gulabon se mahakta hai

kisi mazlum ki aahon ka sauda hone wala hai

parinde ghonslon ki laT mein jo sahme baiThe hain

kisi tufan ki aamad hai andhera hone wala hai

wo meri shaKHsiyat par ab karega tabsira shayad

mere afkar ke rangon ka charcha hone wala hai

badan mein KHun ki ek bund bhi baqi nahin 'arshad'

meri saf mein raqibon ka izafa hone wala hai