andhere aur baDhao to koi baat bane

añdhere aur baḌhāo to koī baat bane

inhī meñ raushnī paao to koī baat bane

is ek baat pe qaa.em hai zindagī kā madār

diyā diye se jalāo to koī baat bane

bikhar na jaa.e mire zabt-e-ġham kā shīrāza

tum apne ashk chhupāo to koī baat bane

haiñ mujh se rūThī huiiñ gardisheñ zamāne kī

qarīb mere tum aao to koī baat bane

zamīñ se kis liye ākāsh ko milāte ho

diloñ ko dil se milāo to koī baat bane

tum apnī sāñsoñ ke is madd-o-jazr hī se 'adīm'

kuchh inqalāb uThāo to koī baat bane

andhere aur baDhao to koi baat bane

inhi mein raushni pao to koi baat bane

is ek baat pe qaem hai zindagi ka madar

diya diye se jalao to koi baat bane

bikhar na jae mere zabt-e-gham ka shiraaza

tum apne ashk chhupao to koi baat bane

hain mujh se ruThi huin gardishen zamane ki

qarib mere tum aao to koi baat bane

zamin se kis liye aakash ko milate ho

dilon ko dil se milao to koi baat bane

tum apni sanson ke is madd-o-jazr hi se 'adim'

kuchh inqalab uThao to koi baat bane