andhere se ziyaada raushni taklif deti hai

añdhere se ziyāda raushnī taklīf detī hai

zamāne ko mirī zinda-dilī taklīf detī hai

bahut achchhā thā jab nā-āshnā thā husn duniyā se

mujhe ab hosh-mandī āgahī taklīf detī hai

vo aksar chheḌ dete haiñ mire derīna zaḳhmoñ ko

na jaane kyuuñ unheñ merī ḳhushī taklīf detī hai

jo apne sīnoñ meñ dil kī ba-jā-e-sañg rakhte haiñ

unheñ ham ahl-e-dil kī sarḳhushī taklīf detī hai

ho takmīl-e-havas jis dostī kā muntahā ai dil

mujhe vo rasm-o-rāh-e-āshiqī taklīf detī hai

ḳhudā ke fazl se mujh ko sabhī kuchh mil gayā lekin

mujhe is bazm meñ un kī kamī taklīf detī hai

'sahar' vābasta merī shā.irī hai un kī yādoñ se

kabhī pur-kaif hotī hai kabhī taklīf detī hai

andhere se ziyaada raushni taklif deti hai

zamane ko meri zinda-dili taklif deti hai

bahut achchha tha jab na-ashna tha husn duniya se

mujhe ab hosh-mandi aagahi taklif deti hai

wo aksar chheD dete hain mere derina zaKHmon ko

na jaane kyun unhen meri KHushi taklif deti hai

jo apne sinon mein dil ki ba-ja-e-sang rakhte hain

unhen hum ahl-e-dil ki sarKHushi taklif deti hai

ho takmil-e-hawas jis dosti ka muntaha ai dil

mujhe wo rasm-o-rah-e-ashiqi taklif deti hai

KHuda ke fazl se mujh ko sabhi kuchh mil gaya lekin

mujhe is bazm mein un ki kami taklif deti hai

'sahar' wabasta meri shairi hai un ki yaadon se

kabhi pur-kaif hoti hai kabhi taklif deti hai