andheri raat ka chehra ujalta kab tak

añdherī raat kā chehra ujāltā kab tak

qadam qadam pe qayāmat khañgāltā kab tak

use bhī bhuuk lagī thī maiñ ḳhud bhī pyāsā thā

vo merī baat ko bātoñ meñ Tāltā kab tak

use to pī ga.iiñ chingāriyāñ hī jazboñ kī

fazā meñ kāñch ke TukḌe uchhāltā kab tak

jo lamha lamha dhañsā jā rahā thā daldal meñ

ġhamoñ ke bojh vo āḳhir sañbhāltā kab tak

lahūluhān thā hālāt kā badan 'sābir'

usuul apnā ahinsā sañbhāltā kab tak

andheri raat ka chehra ujalta kab tak

qadam qadam pe qayamat khangalta kab tak

use bhi bhuk lagi thi main KHud bhi pyasa tha

wo meri baat ko baaton mein Talta kab tak

use to pi gain chingariyan hi jazbon ki

faza mein kanch ke TukDe uchhaalta kab tak

jo lamha lamha dhansa ja raha tha daldal mein

ghamon ke bojh wo aaKHir sanbhaalta kab tak

lahuluhan tha haalat ka badan 'sabir'

usul apna ahinsa sanbhaalta kab tak