andheri shab hai zarurat nahin batane ki

añdherī shab hai zarūrat nahīñ batāne kī

mirī taraf se ijāzat hai lauT jaane kī

koī to ho jo mizāj-e-āshnā-e-dilbar ho

kisī ke paas to chābī ho is ḳhazāne kī

vo chāhtā to mujhe sañg-dil banā detā

zyādtī mire dil par mire ḳhudā ne kī

maiñ dūsroñ ke gharoñ ko bachā rahā huuñ magar

kisī ko fikr nahīñ merā ghar bachāne kī

maiñ apne aap se munkir huā to TuuT gayā

ye dushmanī mire andar kī intihā ne kī

jise harīf samajh kar kiyā hai qatl 'niyāz'

vo aabrū thā usī be-navā gharāne kī

andheri shab hai zarurat nahin batane ki

meri taraf se ijazat hai lauT jaane ki

koi to ho jo mizaj-e-ashna-e-dilbar ho

kisi ke pas to chabi ho is KHazane ki

wo chahta to mujhe sang-dil bana deta

zyaadti mere dil par mere KHuda ne ki

main dusron ke gharon ko bacha raha hun magar

kisi ko fikr nahin mera ghar bachane ki

main apne aap se munkir hua to TuT gaya

ye dushmani mere andar ki intiha ne ki

jise harif samajh kar kiya hai qatl 'niyaz'

wo aabru tha usi be-nawa gharane ki