andheron se agar aaina-samani hui hogi

añdheroñ se agar ā.īna-sāmānī huī hogī

baḌī mushkil se koī shakl nūrānī huī hogī

charāġhoñ ke pate milte nahīñ shab-gāh-e-hastī meñ

havā-e-shām tujh se koī nādānī huī hogī

nahīñ mujh sā koī tanhā zamāne meñ huā hogā

na ābāde meñ is sūrat bayābānī huī hogī

nazar ke sāmne phailā huā dashtāb sā kyā hai

yaqīnan āb-zāroñ meñ shatarbānī huī hogī

paroñ par āsmānī vasvase lipTe rahe hoñge

parindoñ se tabhī parvāz gardānī huī hogī

phir apnā hissa lene aaj ḳhuddārī nahīñ aa.ī

zamīñ-dāroñ se baTvāre meñ man-mānī huī hogī

shikār-e-sher-shor-añgez un ke haath aa jaa.e

isī zid meñ harīfoñ se ġhazal-rānī huī hogī

yuuñ barfānī havāoñ se uqaab uljhe agar hoñge

to shiryānoñ meñ bahtī aag bhī paanī huī hogī

nikāle hoñge jab afkār ne sheroñ meñ gul-būTe

tabhī koī ġhazal 'parvez' rahmānī huī hogī

andheron se agar aaina-samani hui hogi

baDi mushkil se koi shakl nurani hui hogi

charaghon ke pate milte nahin shab-gah-e-hasti mein

hawa-e-sham tujh se koi nadani hui hogi

nahin mujh sa koi tanha zamane mein hua hoga

na aabaade mein is surat bayabani hui hogi

nazar ke samne phaila hua dashtab sa kya hai

yaqinan aab-zaron mein shatarbani hui hogi

paron par aasmani waswase lipTe rahe honge

parindon se tabhi parwaz gardani hui hogi

phir apna hissa lene aaj KHuddari nahin aai

zamin-daron se baTware mein man-mani hui hogi

shikar-e-sher-shor-angez un ke hath aa jae

isi zid mein harifon se ghazal-rani hui hogi

yun barfani hawaon se uqab uljhe agar honge

to shiryanon mein bahti aag bhi pani hui hogi

nikale honge jab afkar ne sheron mein gul-buTe

tabhi koi ghazal 'parwez' rahmani hui hogi