اندھی یہ آنکھ دیکھنے والی نہ ہو کہیں

اندھی یہ آنکھ دیکھنے والی نہ ہو کہیں

دنیا ہماری خام خیالی نہ ہو کہیں

دستک کسی خیال کی جس وقت بھی سنی

دل نے کہا کہ دیکھ سوالی نہ ہو کہیں

رونے کے بعد آنکھ مری سرخ ہو گئی

اشکوں میں میرے خون کی لالی نہ ہو کہیں

یہ کیا لبوں سے کوئی کرن پھوٹتی نہیں

زنبیل قلب درد سے خالی نہ ہو کہیں

لکھی گئی ہے خون سے تاریخ صبر کی

سچائی سے زمین یہ خالی نہ ہو کہیں

مشتاقؔ تیرے طور طریقے عجیب ہیں

کہتے ہیں لوگ تو بھی مثالی نہ ہو کہیں