andhi ye aankh dekhne wali na ho kahin

andhī ye aañkh dekhne vaalī na ho kahīñ

duniyā hamārī ḳhām-ḳhayālī na ho kahīñ

dastak kisī ḳhayāl kī jis vaqt bhī sunī

dil ne kahā ki dekh savālī na ho kahīñ

rone ke baad aañkh mirī surḳh ho ga.ī

ashkoñ meñ mere ḳhuun kī laalī na ho kahīñ

ye kyā laboñ se koī kiran phūTtī nahīñ

zambīl-e-qalb dard se ḳhālī na ho kahīñ

likkhī ga.ī hai ḳhuun se tārīḳh sabr kī

sachchā.ī se zamīn ye ḳhālī na ho kahīñ

'mushtāq' tere taur tarīqe ajiib haiñ

kahte haiñ log tū bhī misālī na ho kahīñ

andhi ye aankh dekhne wali na ho kahin

duniya hamari KHam-KHayali na ho kahin

dastak kisi KHayal ki jis waqt bhi suni

dil ne kaha ki dekh sawali na ho kahin

rone ke baad aankh meri surKH ho gai

ashkon mein mere KHun ki lali na ho kahin

ye kya labon se koi kiran phuTti nahin

zambil-e-qalb dard se KHali na ho kahin

likkhi gai hai KHun se tariKH sabr ki

sachchai se zamin ye KHali na ho kahin

'mushtaq' tere taur tariqe ajib hain

kahte hain log tu bhi misali na ho kahin