andoh-e-besh-o-kam na gham-e-KHair-o-shar mein hai

andoh-e-besh-o-kam na ġham-e-ḳhair-o-shar meñ hai

rāz-e-hayāt vus.at-e-fikr-o-nazar meñ hai

vo masti-e-nazar hai usī dil kī pāsdār

jo dil ba-rū-e-kār gunāh-e-nazar meñ hai

us kā ḳhayāl us kā tasavvur usī kī yaad

koī nahīñ nazar meñ vo jab se nazar meñ hai

kaif āshnā thī ziist kabhī jis kī diid se

vo chashm-e-mast aaj bhī merī nazar meñ hai

kaisā tilism-e-husn hai us jalva-gāh meñ

jalva nazar meñ hai kabhī parda nazar meñ hai

kyā shai atā-e-ġham kī hai kaifiyyat ai 'sahāb'

ḳhalvat harīm-e-dil meñ hai mahfil nazar meñ hai

andoh-e-besh-o-kam na gham-e-KHair-o-shar mein hai

raaz-e-hayat wusat-e-fikr-o-nazar mein hai

wo masti-e-nazar hai usi dil ki pasdar

jo dil ba-ru-e-kar gunah-e-nazar mein hai

us ka KHayal us ka tasawwur usi ki yaad

koi nahin nazar mein wo jab se nazar mein hai

kaif aashna thi zist kabhi jis ki did se

wo chashm-e-mast aaj bhi meri nazar mein hai

kaisa tilism-e-husn hai us jalwa-gah mein

jalwa nazar mein hai kabhi parda nazar mein hai

kya shai ata-e-gham ki hai kaifiyyat ai 'sahab'

KHalwat harim-e-dil mein hai mahfil nazar mein hai