انگوٹھا چھاپ شاعر ہوں مرا علم و ہنر کیا ہے

انگوٹھا چھاپ شاعر ہوں مرا علم و ہنر کیا ہے

ستائش کا صلہ کیسا مذمت میں ضرر کیا ہے

میں پودا اپنی مٹی کا میں کیا جانوں شجر کیا ہے

میں قطرہ اپنی سیپی میں مجھے لگتا گہر کیا ہے

مرے احساس اپنے ہیں مری اپنی ہے بینائی

زمانہ کا چلن کیا ہے سیانوں کی نظر کیا ہے

مرا طرز سخن بے ساختہ ہے آپ ہی جانیں

پرانا یا نیا ہے بے اثر یا با اثر کیا ہے

بہت آسان ہے کار جہاں میرے لیے لیکن

جہاں والے کریں دشوار ان کو مجھ سے ڈر کیا ہے

میں چلتے چلتے اکثر اپنی منزل کو بدلتا ہوں

مرا ہم راہ ہوگا کون میری رہگزر کیا ہے

ہوں کم اوقات ذرہؔ پر نہیں قائل کسی کا بھی

سکندر کیا قلندر کیا مقدر کیا بشر کیا ہے