anguTha-chhap shair hun mera ilm-o-hunar kya hai

añgūThā-chhāp shā'ir huuñ mirā 'ilm-o-hunar kyā hai

satā.ish kā sila kaisā mazammat meñ zarar kyā hai

maiñ paudā apnī miTTī kā maiñ kyā jānūñ shajar kyā hai

maiñ qatra apnī siipī meñ mujhe lagtā guhar kyā hai

mire ehsās apne haiñ mirī apnī hai bīnā.ī

zamāne kā chalan kyā hai siyānoñ kī nazar kyā hai

mirā tarz-e-suḳhan be-sāḳhta hai aap hī jāneñ

purānā yā nayā hai be-asar yā bā-asar kyā hai

bahut āsān hai kār-e-jahāñ mere liye lekin

jahāñ vaale kareñ dushvār in ko mujh se Dar kyā hai

maiñ chalte chalte aksar apnī manzil ko badaltā huuñ

mirā hamrāh hogā kaun merī rah-guzar kyā hai

huuñ kam-auqāt 'zarra' par nahīñ qaa.il kisī kā bhī

sikandar kyā qalandar kyā muqaddar kyā bashar kyā hai

anguTha-chhap sha'ir hun mera 'ilm-o-hunar kya hai

sataish ka sila kaisa mazammat mein zarar kya hai

main pauda apni miTTi ka main kya jaanun shajar kya hai

main qatra apni sipi mein mujhe lagta guhar kya hai

mere ehsas apne hain meri apni hai binai

zamane ka chalan kya hai siyanon ki nazar kya hai

mera tarz-e-suKHan be-saKHta hai aap hi jaanen

purana ya naya hai be-asar ya ba-asar kya hai

bahut aasan hai kar-e-jahan mere liye lekin

jahan wale karen dushwar in ko mujh se Dar kya hai

main chalte chalte aksar apni manzil ko badalta hun

mera hamrah hoga kaun meri rah-guzar kya hai

hun kam-auqat 'zarra' par nahin qail kisi ka bhi

sikandar kya qalandar kya muqaddar kya bashar kya hai