anjam shab-e-gham ka likha aur hi kuchh hai

anjām shab-e-ġham kā likhā aur hī kuchh hai

lagtā hai ki manzūr-e-ḳhudā aur hī kuchh hai

shāyad abhī tashḳhīs-e-maraz ho nahīñ paa.ī

bīmārī hai kuchh aur davā aur hī kuchh hai

sab pyaar kī tash.hīr kiyā karte haiñ lekin

māhaul hai kuchh aur fazā aur hī kuchh hai

nā-fahm agar naġhma samajhte haiñ to samjheñ

gulshan meñ anādil kī navā aur hī kuchh hai

gahvāra-e-har-shāḳh meñ gul hai abhī bechain

gulshan kī abhī āb-o-havā aur hī kuchh hai

har gaam pe chubhne lage kyoñ paañv meñ kāñTe

nīche ravish-e-gul ke bichhā aur hī kuchh hai

duniyā meñ har ik shai ke muqaddar meñ hai jalnā

jalne kī magar sab kī adā aur hī kuchh hai

ma.alūm hai jaltā hai charāġhoñ meñ faqat tel

lekin tirī mahfil meñ jalā aur hī kuchh hai

hoñToñ pe tabassum liye phirte raho 'kausar'

chehre pe magar haal likhā aur hī kuchh hai

anjam shab-e-gham ka likha aur hi kuchh hai

lagta hai ki manzur-e-KHuda aur hi kuchh hai

shayad abhi tashKHis-e-maraz ho nahin pai

bimari hai kuchh aur dawa aur hi kuchh hai

sab pyar ki tashhir kiya karte hain lekin

mahaul hai kuchh aur faza aur hi kuchh hai

na-fahm agar naghma samajhte hain to samjhen

gulshan mein anadil ki nawa aur hi kuchh hai

gahwara-e-har-shaKH mein gul hai abhi bechain

gulshan ki abhi aab-o-hawa aur hi kuchh hai

har gam pe chubhne lage kyon panw mein kanTe

niche rawish-e-gul ke bichha aur hi kuchh hai

duniya mein har ek shai ke muqaddar mein hai jalna

jalne ki magar sab ki ada aur hi kuchh hai

malum hai jalta hai charaghon mein faqat tel

lekin teri mahfil mein jala aur hi kuchh hai

honTon pe tabassum liye phirte raho 'kausar'

chehre pe magar haal likha aur hi kuchh hai