انجان بستیوں کا پتا پوچھتا ہوں میں

انجان بستیوں کا پتا پوچھتا ہوں میں

یہ کس کی جستجو ہے کسے ڈھونڈھتا ہوں میں

جب میرے دل سے دور مرا ہم نفس نہیں

سارے جہاں کی خاک عبث چھانتا ہوں میں

کیا جبر تھا کہ سب کی زباں گنگ ہو گئی

کیا جرم تھا کہ جس کی سزا چاہتا ہوں میں

پہلے تو میں بھی ہنس کے اسے ٹالتا رہا

اب دل جو کہہ رہا ہے وہی مانتا ہوں میں

یہ فاصلہ تو صرف نظر کا فریب ہے

ہم کس قدر قریب ہیں یہ جانتا ہوں میں

منزل تو صرف نام ہے پہچان کے لئے

جس کی تمہیں تلاش ہے وہ راستہ ہوں میں