anjaane KHwab ki KHatir kyun chain ganwaya

anjāne ḳhvāb kī ḳhātir kyuuñ chain gañvāyā

kab vaqt kā panchhī Therā kab saaya haath meñ aayā

ik nuur kī chādar simTī be-jān fazā dhundlā.ī

ghar aa.e ghanere bādal yā chāñd gahan meñ aayā

āñkhoñ se nashīlī shab kī dhotī rahī shabnam kājal

har samt syāhī phailī har samt añdherā chhāyā

jo baat laboñ par aa.ī vo baat banī afsāna

ik giit ko is duniyā ne kitnī hī dhunoñ meñ gaayā

dil dard se bhar bhar aayā palkoñ pe na chamke aañsū

āñkhoñ ne samundar bhar ke qatre ke liye tarsāyā

aise bhī zamāne guzre din soyā rāteñ jāgīñ

ehsās kā rañgīñ āñchal sannāToñ meñ lahrāyā

ḳhushiyoñ ko to chhoḌā ham ne ik khel samajh kar 'anjum'

jis ġham ko rag-e-jāñ samjhā us ġham ne hameñ Thukrāyā

anjaane KHwab ki KHatir kyun chain ganwaya

kab waqt ka panchhi Thera kab saya hath mein aaya

ek nur ki chadar simTi be-jaan faza dhundlai

ghar aae ghanere baadal ya chand gahan mein aaya

aankhon se nashili shab ki dhoti rahi shabnam kajal

har samt syahi phaili har samt andhera chhaya

jo baat labon par aai wo baat bani afsana

ek git ko is duniya ne kitni hi dhunon mein gaya

dil dard se bhar bhar aaya palkon pe na chamke aansu

aankhon ne samundar bhar ke qatre ke liye tarsaya

aise bhi zamane guzre din soya raaten jagin

ehsas ka rangin aanchal sannaTon mein lahraya

KHushiyon ko to chhoDa hum ne ek khel samajh kar 'anjum'

jis gham ko rag-e-jaan samjha us gham ne hamein Thukraya