anjum-o-mehr-o-gul-o-barg-o-saba kuchh bhi nahin

anjum-o-mehr-o-gul-o-barg-o-sabā kuchh bhī nahīñ

ḳhuub dekhā ba-ḳhudā ġhair-e-ḳhudā kuchh bhī nahīñ

vahshat-o-mastī-o-hairat ke sivā kuchh bhī nahīñ

hai jise us kā pata apnā pata kuchh bhī nahīñ

hastī-e-ālam-e-hushiyār ho ki ho apnā vajūd

sab kuchh ik vahm-e-musalsal ke sivā kuchh bhī nahīñ

ishq to zinda-e-jāved banā detā hai

ishq ke baab meñ mafhūm-e-fanā kuchh bhī nahīñ

kab se hai kaun hai kyuuñ hai vo kahāñ hai kyā hai

zāt-e-be-chūñ meñ ye sab chūn-o-charā kuchh bhī nahīñ

aur sab kuchh ho zamāne ko mubārak ai 'dil'

yaañ to dāman meñ mohammad ke sivā kuchh bhī nahīñ

anjum-o-mehr-o-gul-o-barg-o-saba kuchh bhi nahin

KHub dekha ba-KHuda ghair-e-KHuda kuchh bhi nahin

wahshat-o-masti-o-hairat ke siwa kuchh bhi nahin

hai jise us ka pata apna pata kuchh bhi nahin

hasti-e-alam-e-hushiyar ho ki ho apna wajud

sab kuchh ek wahm-e-musalsal ke siwa kuchh bhi nahin

ishq to zinda-e-jawed bana deta hai

ishq ke bab mein mafhum-e-fana kuchh bhi nahin

kab se hai kaun hai kyun hai wo kahan hai kya hai

zat-e-be-chun mein ye sab chun-o-chara kuchh bhi nahin

aur sab kuchh ho zamane ko mubarak ai 'dil'

yan to daman mein mohammad ke siwa kuchh bhi nahin