anjuman ho gai sargarm-e-bayan mere baad

anjuman ho ga.ī sargarm-e-bayāñ mere baad

be-zabānoñ ne bhī kholī hai zabāñ mere baad

kaun ghar apnā jalā.egā pa.e-dīdan-e-barq

uThne pā.egā na gulshan se dhuāñ mere baad

kis ko aatā hai jale dil se duā.eñ denā

miT ke rah jā.egī ye rasm-e-fuġhāñ mere baad

ġhamza-o-nāz se ab chheḌ kahāñ hotī hai

chaliye pur-amn huā shahr-e-butāñ mere baad

āsmāñ sar-ba-garebāñ hai zamīñ ḳhāk-ba-sar

chashmakeñ kis se kare kāhkashāñ mere baad

DhūñDte ā.eñge pākān-e-tamanna 'jauhar'

mere bahke hue qadmoñ ke nishāñ mere baad

anjuman ho gai sargarm-e-bayan mere baad

be-zabanon ne bhi kholi hai zaban mere baad

kaun ghar apna jalaega pae-didan-e-barq

uThne paega na gulshan se dhuan mere baad

kis ko aata hai jale dil se duaen dena

miT ke rah jaegi ye rasm-e-fughan mere baad

ghamza-o-naz se ab chheD kahan hoti hai

chaliye pur-amn hua shahr-e-butan mere baad

aasman sar-ba-gareban hai zamin KHak-ba-sar

chashmaken kis se kare kahkashan mere baad

DhunDte aaenge pakan-e-tamanna 'jauhar'

mere bahke hue qadmon ke nishan mere baad