anmol sahi nayab sahi be-dam-o-diram bik jate hain

anmol sahī nāyāb sahī be-dām-o-diram bik jaate haiñ

bas pyaar hamārī qīmat hai mil jaa.e to ham bik jaate haiñ

sikkoñ kī chamak pe girte hue dekhā hai shaiḳh o barhaman ko

phir mere khañDar kī qīmat kyā jab dair o haram bik jaate haiñ

kyā sharm-e-ḳhudī kyā pās-e-hayā ġhurbat kī añdherī rātoñ meñ

kitne hī butān-e-zohra-jabīñ bā-dīda-e-nam bik jaate haiñ

ye hirs-o-havā kī manzil hai ai rāh-ravo hushyār zarā

jab haath rupahle baḌhte haiñ rahbar ke qadam bik jaate haiñ

vo sāhib-e-ilm-o-hikmat hoñ yā paikar-e-aql-o-dānā.ī

ik mere dil-e-nādāñ ke sivā sab terī qasam bik jaate haiñ

ye shahr hai shahr-e-zardārī kyā hogā 'shamīm' anjām tirā

yaañ zehn ḳharīdā jaatā hai yaañ ahl-e-qalam bik jaate haiñ

anmol sahi nayab sahi be-dam-o-diram bik jate hain

bas pyar hamari qimat hai mil jae to hum bik jate hain

sikkon ki chamak pe girte hue dekha hai shaiKH o barhaman ko

phir mere khanDar ki qimat kya jab dair o haram bik jate hain

kya sharm-e-KHudi kya pas-e-haya ghurbat ki andheri raaton mein

kitne hi butan-e-zohra-jabin ba-dida-e-nam bik jate hain

ye hirs-o-hawa ki manzil hai ai rah-rawo hushyar zara

jab hath rupahle baDhte hain rahbar ke qadam bik jate hain

wo sahib-e-ilm-o-hikmat hon ya paikar-e-aql-o-danai

ek mere dil-e-nadan ke siwa sab teri qasam bik jate hain

ye shahr hai shahr-e-zardari kya hoga 'shamim' anjam tera

yan zehn KHarida jata hai yan ahl-e-qalam bik jate hain