ho raha hai TukDe TukDe dil mere gham-KHwar ka

ho rahā hai TukḌe TukḌe dil mere ġham-ḳhvār kā

hai mire zaḳhm-e-jigar meñ kaaT teġh-e-yār kā

shor hai ġhul hai jahāñ meñ murdan-e-dushvār kā

ek chaltā vaar hai teġh-e-nigāh-e-yār kā

naġhma dilkash hai dushman andalīb-e-zār kā

hai qafas meñ band honā kholnā minqār kā

mast kuchh aisā huuñ chashm-e-nīm-e-mast-e-yār kā

zarf ḳhālī jāntā huuñ sāġhar-e-sarshār kā

kyā kahūñ kyā haal hai mujh nā-tavān-o-zār kā

huuñ nigāh-e-vāpsīñ apnī dil-e-bīmār kā

āsmāñ phirtā hai hasb-e-mudd.ā-e-mudda.ī

raah par laanā ġhazab hai aise kaj-raftār kā

bal be-bad-ḳhūī mizāj-e-yār meñ sau bal paḌe

ek bal niklā jo tār-e-gesū-e-ḳham-dār kā

dast-e-sāqī par lagā.e aañkh rahtā hai mudām

jām-e-mai hai dīda-e-hasrat kisī mai-ḳhvār kā

kis qadar bashshāsh hai asrār se ḳhālī nahīñ

rañg merā uḌ gayā muñh dekh kar sofār kā

maiñ giraftār-e-vafā huuñ chhuT ke jā.ūñgā kahāñ

baal bāñdhā chor huuñ har tār-e-zulf-e-yār kā

koī ik gardish to ho aisī bhī haañ ai chashm-e-yār

shaiḳh pūchhe mujh se rasta ḳhāna-e-ḳhummar kā

vaah re qismat ki vo mere muqaddar meñ paḌā

aah ne jo bal nikālā charḳh-e-kaj-raftār kā

le chalo vaa.iz ko hāthoñ-hāth uThā.e mai-kasho

pāsbāñ chal kar banā do ḳhāna-e-ḳhummar kā

jaan sunñe vāloñ kī vaa.iz laboñ par aa ga.ī

vaah kyā kahnā hai hazrat aap kī guftār kā

hai jo uftādoñ se kuchh nafrat to nafrat hī sahī

kyuuñ zamīñ par gir paḌā saaya terī dīvār kā

shakl-e-marham dekh kar Dartā hai merā zaḳhm-e-dil

khol kar aañkh apnī dekhā hai jo muñh sofār kā

naala mere lab pe aatā hai jo sau sau naaz se

koī partav le uḌā shāyad tirī raftār kā

ye to zāhir hai ki vasl un kā kahāñ aur ham kahāñ

lekin is paiġhām meñ kuchh lutf hai takrār kā

dil ko le jā mujh se yā to aap le yā baañT de

par ye hissa hai terī gesū ke ik ik taar kā

al-amān us burrish-e-teġh-e-nazar se al-amān

māntī hai barq bhī lohā terī talvār kā

haath sambhlā rakhiyo ai mashshāta-e-jādū-tarāz

ik jahān-e-dil hai basta turra-e-tarrār kā

huuñ to dīvāna vale hushyārī-e-matlab to dekh

sar bhī phoḌā DhūñD kar patthar tirī dīvār kā

kuchh idhar se arz matlab aur udhar se kuchh nahīñ

ik judāgāna mazā hai vasl meñ takrār kā

kitnā gustāḳhī se khīñchā hai tujhe āġhosh meñ

maiñ gale kā haar huuñ tere gale ke haar kā

kyuuñ nahīñ girtā mire āfat-zadoñ par haa.e haa.e

āsmāñ bhī hai magar saaya tirī dīvār kā

chhū ga.ī kāfir havā kis kī nigāh-e-garm se

phuul kumlāyā huā hai kuchh gul-e-ruḳhsār kā

miltī hai āḳhīr ko kuchh kaifiyat-e-soz-o-gudāz

sā.iqa hissa hai pahlā tālib-e-dīdār kā

ek jalva par chamak uThtī hai sab aqlīm-e-ishq

kaun aalam hai hamāre dīda-e-bedār kā

āsmāñ rakhtā hai āñkheñ mehr-o-mah se us se pūchh

kaun aalam hai hamāre dīda-e-bedār kā

husn meñ ḳhud-raftagī hai to nahīñ maan.e hijāb

bū-e-gul ko phāñdnā kyā baaġh kī dīvār kā

vo hī apnī chaal hai koī mare koī jiye

le uḌe saarā chalan tum charḳh-e-kaj-raftār kā

nāḳhun-e-shamshīr-e-qātil ko duā dete haiñ ham

uqda kholā ḳhuub 'anvar' murdan-e-dushvār kā

ho raha hai TukDe TukDe dil mere gham-KHwar ka

hai mere zaKHm-e-jigar mein kaT tegh-e-yar ka

shor hai ghul hai jahan mein murdan-e-dushwar ka

ek chalta war hai tegh-e-nigah-e-yar ka

naghma dilkash hai dushman andalib-e-zar ka

hai qafas mein band hona kholna minqar ka

mast kuchh aisa hun chashm-e-nim-e-mast-e-yar ka

zarf KHali jaanta hun saghar-e-sarshaar ka

kya kahun kya haal hai mujh na-tawan-o-zar ka

hun nigah-e-wapsin apni dil-e-bimar ka

aasman phirta hai hasb-e-mudda-e-muddai

rah par lana ghazab hai aise kaj-raftar ka

bal be-bad-KHui mizaj-e-yar mein sau bal paDe

ek bal nikla jo tar-e-gesu-e-KHam-dar ka

dast-e-saqi par lagae aankh rahta hai mudam

jam-e-mai hai dida-e-hasrat kisi mai-KHwar ka

kis qadar bashshash hai asrar se KHali nahin

rang mera uD gaya munh dekh kar sofar ka

main giraftar-e-wafa hun chhuT ke jaunga kahan

baal bandha chor hun har tar-e-zulf-e-yar ka

koi ek gardish to ho aisi bhi han ai chashm-e-yar

shaiKH puchhe mujh se rasta KHana-e-KHummar ka

wah re qismat ki wo mere muqaddar mein paDa

aah ne jo bal nikala charKH-e-kaj-raftar ka

le chalo waiz ko hathon-hath uThae mai-kasho

pasban chal kar bana do KHana-e-KHummar ka

jaan sunne walon ki waiz labon par aa gai

wah kya kahna hai hazrat aap ki guftar ka

hai jo uftadon se kuchh nafrat to nafrat hi sahi

kyun zamin par gir paDa saya teri diwar ka

shakl-e-marham dekh kar Darta hai mera zaKHm-e-dil

khol kar aankh apni dekha hai jo munh sofar ka

nala mere lab pe aata hai jo sau sau naz se

koi partaw le uDa shayad teri raftar ka

ye to zahir hai ki wasl un ka kahan aur hum kahan

lekin is paigham mein kuchh lutf hai takrar ka

dil ko le ja mujh se ya to aap le ya banT de

par ye hissa hai teri gesu ke ek ek tar ka

al-aman us burrish-e-tegh-e-nazar se al-aman

manti hai barq bhi loha teri talwar ka

hath sambhla rakhiyo ai mashshata-e-jadu-taraaz

ek jahan-e-dil hai basta turra-e-tarrar ka

hun to diwana wale hushyari-e-matlab to dekh

sar bhi phoDa DhunD kar patthar teri diwar ka

kuchh idhar se arz matlab aur udhar se kuchh nahin

ek judagana maza hai wasl mein takrar ka

kitna gustaKHi se khincha hai tujhe aaghosh mein

main gale ka haar hun tere gale ke haar ka

kyun nahin girta mere aafat-zadon par hae hae

aasman bhi hai magar saya teri diwar ka

chhu gai kafir hawa kis ki nigah-e-garm se

phul kumlaya hua hai kuchh gul-e-ruKHsar ka

milti hai aaKHir ko kuchh kaifiyat-e-soz-o-gudaz

saiqa hissa hai pahla talib-e-didar ka

ek jalwa par chamak uThti hai sab aqlim-e-ishq

kaun aalam hai hamare dida-e-bedar ka

aasman rakhta hai aankhen mehr-o-mah se us se puchh

kaun aalam hai hamare dida-e-bedar ka

husn mein KHud-raftagi hai to nahin mane hijab

bu-e-gul ko phandna kya bagh ki diwar ka

wo hi apni chaal hai koi mare koi jiye

le uDe sara chalan tum charKH-e-kaj-raftar ka

naKHun-e-shamshir-e-qatil ko dua dete hain hum

uqda khola KHub 'anwar' murdan-e-dushwar ka