apna chhoDa hua ghar yaad aaya

apnā chhoḌā huā ghar yaad aayā

ḳhuld meñ ḳhuld-nazar yaad aayā

kitnī sadiyoñ kī thakan hai jaañ par

ek lamhe kā safar yaad aayā

jis ke saa.e ne jalāyā mujh ko

phir vo sarsabz shajar yaad aayā

haath meñ chāñd kī miTTī le kar

kitne firqoñ kā safar yaad aayā

ham hue apnī nazar meñ jhūTe

us kā paimān-e-nazar yaad aayā

us se ab ḳhvāb kā rishta bhī ġhalat

sar jhaTak de vo agar yaad aayā

kyā na sābit thī mirī ḳhush-hunarī

kyuuñ tirā husn-e-nazar yaad aayā

phir rag-o-pai kī fazā hai bojhal

phir bagūloñ kā safar yaad aayā

muddatoñ jis kī parastish kī thī

phir vo ābād khañDar yaad aayā

the unhī āñkhoñ meñ sapne kitne

apnā āġhāz-e-safar yaad aayā

raat yuuñ ghaas kī ḳhushbū lipTī

niiñd hī aa.ī na ghar yaad aayā

jam ga.e miil ke patthar kī tarah

kyā sar-e-rāhguzar yaad aayā

phir hai 'shāhīn' ġhazal rāz-e-chaman

phir koī soḳhta-par yaad aayā

apna chhoDa hua ghar yaad aaya

KHuld mein KHuld-nazar yaad aaya

kitni sadiyon ki thakan hai jaan par

ek lamhe ka safar yaad aaya

jis ke sae ne jalaya mujh ko

phir wo sarsabz shajar yaad aaya

hath mein chand ki miTTi le kar

kitne firqon ka safar yaad aaya

hum hue apni nazar mein jhuTe

us ka paiman-e-nazar yaad aaya

us se ab KHwab ka rishta bhi ghalat

sar jhaTak de wo agar yaad aaya

kya na sabit thi meri KHush-hunari

kyun tera husn-e-nazar yaad aaya

phir rag-o-pai ki faza hai bojhal

phir bagulon ka safar yaad aaya

muddaton jis ki parastish ki thi

phir wo aabaad khanDar yaad aaya

the unhi aankhon mein sapne kitne

apna aaghaz-e-safar yaad aaya

raat yun ghas ki KHushbu lipTi

nind hi aai na ghar yaad aaya

jam gae mil ke patthar ki tarah

kya sar-e-rahguzar yaad aaya

phir hai 'shahin' ghazal raaz-e-chaman

phir koi soKHta-par yaad aaya