apna daman dekh kar ghabra gae

apnā dāman dekh kar ghabrā ga.e

ḳhuun ke chhīñTe kahāñ tak aa ga.e

bhuul thī apnī kisī qātil ko ham

devtā samjhe the dhoka khā ga.e

har-qadam par saath haiñ rusvā.iyāñ

ham to apne aap se sharmā ga.e

ham chale the un ke aañsū poñchhne

apnī āñkhoñ meñ bhī aañsū aa ga.e

saath un ke merī duniyā bhī ga.ī

aah vo duniyā se merī kyā ga.e

'naqsh' koī ham bhī jaa.eñ chhoḌ kar

jaise 'mīr'-o-'ġhālib'-o-'saudā' ga.e

apna daman dekh kar ghabra gae

KHun ke chhinTe kahan tak aa gae

bhul thi apni kisi qatil ko hum

dewta samjhe the dhoka kha gae

har-qadam par sath hain ruswaiyan

hum to apne aap se sharma gae

hum chale the un ke aansu ponchhne

apni aankhon mein bhi aansu aa gae

sath un ke meri duniya bhi gai

aah wo duniya se meri kya gae

'naqsh' koi hum bhi jaen chhoD kar

jaise 'mir'-o-'ghaalib'-o-'sauda' gae