apna gham be-libas kya karte

apnā ġham be-libās kyā karte

dostoñ ko udaas kyā karte

terī āñkheñ thiiñ mai-kada lekin

apne hoñToñ kī pyaas kyā karte

ham ko apnā lahū hī piinā thā

phir badal kar gilās kyā karte

aap se hāl-e-dil chhupā to na thā

aap se iltimās kyā karte

aa na jaate jo baaġh meñ bhañvre

phuul aisī miThās kyā karte

lamha lamha badaltī duniyā meñ

vaza-dārī kā paas kyā karte

sab to chehroñ se apne the mahrūm

aa.ine in.ikās kyā karte

tujh pe apnā gumān jab na huā

ḳhud pe terā qayās kyā karte

laakh chehre the ek chehre par

phir qayāfa-shanās kyā karte

saarā aalam thā ek 'sāġhar' meñ

jā ke duniyā ke paas kyā karte

apna gham be-libas kya karte

doston ko udas kya karte

teri aankhen thin mai-kada lekin

apne honTon ki pyas kya karte

hum ko apna lahu hi pina tha

phir badal kar gilas kya karte

aap se haal-e-dil chhupa to na tha

aap se iltimas kya karte

aa na jate jo bagh mein bhanwre

phul aisi miThas kya karte

lamha lamha badalti duniya mein

waza-dari ka pas kya karte

sab to chehron se apne the mahrum

aaine inikas kya karte

tujh pe apna guman jab na hua

KHud pe tera qayas kya karte

lakh chehre the ek chehre par

phir qayafa-shanas kya karte

sara aalam tha ek 'saghar' mein

ja ke duniya ke pas kya karte