apna ghar aur jalta hua chhoDna

apnā ghar aur jaltā huā chhoḌnā

ham ne sīkhā nahīñ hausla chhoḌnā

sab miTā denā jab ḳhat mirā chhoḌnā

sirf kāġhaz pe lafz-e-vafā chhoḌnā

DhūñDne kā maza ḳhatm ho jā.egā

apne ḳhat meñ na apnā patā chhoḌnā

kis kī aamad thī jab āñdhiyoñ ne kahā

rāsta dekh kar rāsta chhoḌnā

is tarah jal chukī haiñ ka.ī bastiyāñ

āñdhiyoñ meñ na jaltā diyā chhoḌnā

ham ko chhoḌā hai har shaḳhs ne is liye

ham ne chāhā na dāman tirā chhoḌnā

muskurāhaT kā bhī vaar ḳhālī gayā

tiir ab ke koī dūsrā chhoḌnā

'nūr' ko mai-kade le chale ho magar

is ko tanhā na piitā huā chhoḌnā

apna ghar aur jalta hua chhoDna

hum ne sikha nahin hausla chhoDna

sab miTa dena jab KHat mera chhoDna

sirf kaghaz pe lafz-e-wafa chhoDna

DhunDne ka maza KHatm ho jaega

apne KHat mein na apna pata chhoDna

kis ki aamad thi jab aandhiyon ne kaha

rasta dekh kar rasta chhoDna

is tarah jal chuki hain kai bastiyan

aandhiyon mein na jalta diya chhoDna

hum ko chhoDa hai har shaKHs ne is liye

hum ne chaha na daman tera chhoDna

muskurahaT ka bhi war KHali gaya

tir ab ke koi dusra chhoDna

'nur' ko mai-kade le chale ho magar

is ko tanha na pita hua chhoDna