apna har ek usul mujhe haarna paDa

apnā har ik usuul mujhe hārnā paḌā

thī jiit hī fuzūl mujhe hārnā paḌā

tadbīr merī ek na maanī bahār ne

patjhaḌ ke aage phuul mujhe hārnā paḌā

e.azāz e'timād hai us kā diyā huā

garche na thā qubūl mujhe hārnā paḌā

us kī ḳhushī thī bā.is-e-fat.h-e-hayāt-e-nau

jab vo huā malūl mujhe hārnā paḌā

jab tak havā thī saaf thā maidān haath meñ

āñkhoñ meñ aa.ī dhuul mujhe hārnā paḌā

mere bhī kyā nasīb ki vaqt-e-duā 'muhīt'

sheroñ kā thā nuzūl mujhe hārnā paḌā

apna har ek usul mujhe haarna paDa

thi jit hi fuzul mujhe haarna paDa

tadbir meri ek na mani bahaar ne

patjhaD ke aage phul mujhe haarna paDa

eazaz e'timad hai us ka diya hua

garche na tha qubul mujhe haarna paDa

us ki KHushi thi bais-e-fath-e-hayat-e-nau

jab wo hua malul mujhe haarna paDa

jab tak hawa thi saf tha maidan hath mein

aankhon mein aai dhul mujhe haarna paDa

mere bhi kya nasib ki waqt-e-dua 'muhit'

sheron ka tha nuzul mujhe haarna paDa