apna inkar kar chuka hun main

apnā inkār kar chukā huuñ maiñ

kār-e-dushvār kar chukā huuñ maiñ

yā'nī vahshat meñ aap hī apne

saa.e par vaar kar chukā huuñ maiñ

jo kahānī meñ markazī Thahre

vo bhī kirdār kar chukā huuñ maiñ

be-sabātī pe aañkh se girya

hasb-e-darkār kar chukā huuñ maiñ

ab nasīhat kā fā.eda hī nahīñ

'ishq āzār kar chukā huuñ maiñ

oḌh kar hijr terā ai 'farhat'

ḳhud ko bīmār kar chukā huuñ maiñ

apna inkar kar chuka hun main

kar-e-dushwar kar chuka hun main

ya'ni wahshat mein aap hi apne

sae par war kar chuka hun main

jo kahani mein markazi Thahre

wo bhi kirdar kar chuka hun main

be-sabaati pe aankh se girya

hasb-e-darkar kar chuka hun main

ab nasihat ka faeda hi nahin

'ishq aazar kar chuka hun main

oDh kar hijr tera ai 'farhat'

KHud ko bimar kar chuka hun main