apna nahin aata hai paraya nahin aata

apnā nahīñ aatā hai parāyā nahīñ aatā

ġhurbat meñ koī pūchhne vaalā nahīñ aatā

paḌhnā nahīñ aatā jise likhnā nahīñ aatā

is shaḳhs kī qismat meñ ujālā nahīñ aatā

dete haiñ lahū apne vatan ke liye ham bhī

tārīḳh meñ kyoñ naam hamārā nahīñ aatā

fāteh hī nahīñ fāteh-e-ā'zam use kahiye

jis shaḳhs ko bhūle se bhī ġhussa nahīñ aatā

Dar jaate ho sansār ke har sūd-o-ziyāñ se

aur ḳhauf kabhī dil meñ ḳhudā kā nahīñ aatā

ummīd lagā baiThe haiñ us abr se ham log

jis ko ki kabhī khul ke barasnā nahīñ aatā

ham-mashrab-o-ham-palla ka.ī hote haiñ ham-rāh

ġham aatā hai jis ghar meñ akelā nahīñ aatā

tahrīk se juḌ jā.iye phir dekhiye 'kausar'

tahrīk se juḌne pe buḌhāpā nahīñ aatā

apna nahin aata hai paraya nahin aata

ghurbat mein koi puchhne wala nahin aata

paDhna nahin aata jise likhna nahin aata

is shaKHs ki qismat mein ujala nahin aata

dete hain lahu apne watan ke liye hum bhi

tariKH mein kyon nam hamara nahin aata

fateh hi nahin fateh-e-a'zam use kahiye

jis shaKHs ko bhule se bhi ghussa nahin aata

Dar jate ho sansar ke har sud-o-ziyan se

aur KHauf kabhi dil mein KHuda ka nahin aata

ummid laga baiThe hain us abr se hum log

jis ko ki kabhi khul ke barasna nahin aata

ham-mashrab-o-ham-palla kai hote hain ham-rah

gham aata hai jis ghar mein akela nahin aata

tahrik se juD jaiye phir dekhiye 'kausar'

tahrik se juDne pe buDhapa nahin aata