apna saya dekh kar main be-tahasha Dar gaya

apnā saaya dekh kar maiñ be-tahāsha Dar gayā

hū-ba-hū vaisā lagā jo mere hāthoñ mar gayā

halke se husn-e-tabassum kā bhī andāza huā

bojh saare din kā le kar jab maiñ apne ghar gayā

phal lade us peḌ par phir paḌ gayā pahra kaḌā

pattiyoñ ko chūmtā jab san se ik patthar gayā

kuchh makīnoñ meñ 'ajab tabdīliyāñ paa.ī ga.iiñ

us baḌī building meñ jab kuchh roz vo rah kar gayā

tīliyoñ kī saḳht-jānī aur merī jidd-o-jahd

phir kahāñ parvāz kī ḳhvāhish rahe jab par gayā

apnī āzādī pe maiñ ik chor kā mashkūr huuñ

pair jis chādar meñ phailātā thā vo le kar gayā

apna saya dekh kar main be-tahasha Dar gaya

hu-ba-hu waisa laga jo mere hathon mar gaya

halke se husn-e-tabassum ka bhi andaza hua

bojh sare din ka le kar jab main apne ghar gaya

phal lade us peD par phir paD gaya pahra kaDa

pattiyon ko chumta jab san se ek patthar gaya

kuchh makinon mein 'ajab tabdiliyan pai gain

us baDi building mein jab kuchh roz wo rah kar gaya

tiliyon ki saKHt-jaani aur meri jidd-o-jahd

phir kahan parwaz ki KHwahish rahe jab par gaya

apni aazadi pe main ek chor ka mashkur hun

pair jis chadar mein phailata tha wo le kar gaya