اپنے اندھے ہونے پہ چلائے گا

اپنے اندھے ہونے پہ چلائے گا

سورج جب بھی شام سے ملنے آئے گا

میری نظریں جو کچھ کہنے اٹھیں گی

وہ سننے سے پہلے ہی مر جائے گا

بانجھ آنکھوں کی رت کا پاؤں بھاری ہے

اب یہ موسم ساون کا کہلائے گا

اتنی روز سے مٹھی بند کروں گی میں

خون بہے گا ریکھائیں بن جائے گا

میری چھت پر روز پتنگیں الجھیں گی

روز وہ لینے میرے گھر پر آئے گا

ایک اک پور میں اتری ہے چاہت کی تھکن

آنے والا لمحہ وحشت لائے گا

جسم کے اندر دھڑکن کا ہوگا نیلام

اور وہ پہلی بولی دینے آئے گا

عکس جسے تم بھی سمجھو میں بھی جانوں

پھیل گیا تو چہروں کو سہمائے گا

میں تو حمیراؔ جیسی بھی ہوں اس کی ہوں

دیکھیں اب کے وہ کس روپ میں آئے گا