apne bare mein wo gar puchh len phir kya kahiye

apne baare meñ vo gar pūchh leñ phir kyā kahiye

barmalā jān-e-jigar jān-e-tamannā kahiye

us kī jādū-bharī āñkheñ haiñ ki do paimāne

hāsil-e-zīst use husn-e-sarāpā kahiye

laakh maiñ nīchī nigāheñ rakhūñ kyā hotā hai

vo agar ḳhud ko numāyāñ kareñ phir kyā kahiye

jis ke dekhe se mire dil ko sukūñ miltā hai

aise insāñ ko ghane peḌ kā saayā kahiye

vo ki har baat pe kahte haiñ mujhe tū kyā hai

aise andāz-e-takallum ko bhalā kyā kahiye

'asr-e-hāzir meñ to sach kahne se Dar lagtā hai

farsh ko 'arsh yā qātil ko masīhā kahiye

jis kī guftār yā lahje meñ kashish hai 'dā.em'

us kī har ek adā aañkh kā dhokā kahiye

apne bare mein wo gar puchh len phir kya kahiye

barmala jaan-e-jigar jaan-e-tamanna kahiye

us ki jadu-bhari aankhen hain ki do paimane

hasil-e-zist use husn-e-sarapa kahiye

lakh main nichi nigahen rakhun kya hota hai

wo agar KHud ko numayan karen phir kya kahiye

jis ke dekhe se mere dil ko sukun milta hai

aise insan ko ghane peD ka saya kahiye

wo ki har baat pe kahte hain mujhe tu kya hai

aise andaz-e-takallum ko bhala kya kahiye

'asr-e-hazir mein to sach kahne se Dar lagta hai

farsh ko 'arsh ya qatil ko masiha kahiye

jis ki guftar ya lahje mein kashish hai 'daem'

us ki har ek ada aankh ka dhoka kahiye