اپنے بارے میں وہ گر پوچھ لیں پھر کیا کہیے

اپنے بارے میں وہ گر پوچھ لیں پھر کیا کہیے

برملا جان جگر جان تمنا کہیے

اس کی جادو بھری آنکھیں ہیں کہ دو پیمانے

حاصل زیست اسے حسن سراپا کہیے

لاکھ میں نیچی نگاہیں رکھوں کیا ہوتا ہے

وہ اگر خود کو نمایاں کریں پھر کیا کہیے

جس کے دیکھے سے مرے دل کو سکوں ملتا ہے

ایسے انساں کو گھنے پیڑ کا سایا کہیے

وہ کہ ہر بات پہ کہتے ہیں مجھے تو کیا ہے

ایسے انداز تکلم کو بھلا کیا کہیے

عصر حاضر میں تو سچ کہنے سے ڈر لگتا ہے

فرش کو عرش یا قاتل کو مسیحا کہیے

جس کی گفتار یا لہجے میں کشش ہے دائمؔ

اس کی ہر ایک ادا آنکھ کا دھوکا کہیے