اپنے باطن میں سمیٹے ہوئے ڈر آتا ہے

اپنے باطن میں سمیٹے ہوئے ڈر آتا ہے

اک پرندہ جو مرے سر پہ اتر آتا ہے

بات کرتا ہے محبت میں جنوں کی کوئی

اور اک داغ سا سینے پہ ابھر آتا ہے

کشتیاں بیچ سمندر میں الٹ جاتی ہیں

پھر مدد کرنے کو خوددار بھنور آتا ہے

مجھ پہ آلام کی کثرت سے تعجب کیسا

کچھ درختوں پہ کئی بار ثمر آتا ہے

سینکڑوں زرد خراشیں بھی پس پردہ ہیں

یہ جو اب چہرہ مرا صاف نظر آتا ہے

پھر کسی دل میں اترنا نہیں مشکل جامیؔ

شعر گوئی کا اگر تجھ کو ہنر آتا ہے