apne beganon mein maine farq kuchh paya nahin

apne begānoñ meñ maiñ ne farq kuchh paayā nahīñ

is liye lab par koī shikva kabhī laayā nahīñ

āsmān-e-dil pe bādal ġham kā yuuñ chhāyā rahā

haañ magar āñkhoñ se maiñ ne us ko barsāyā nahīñ

ḳhush-gavarī kā ta.assur aa gayā chehre pe yuuñ

zaḳhm jo dil par lagā thā vo to bhar paayā nahīñ

tum ne ġhairoñ ke liye mujh se kiyā jañg-o-jadal

mere iḳhlās-o-vafā ne tum ko taḌpāyā nahīñ

apnī mahrūmī kā maiñ kyuuñ kar karūñ shikva batā

jāntā huuñ raat kā hotā koī saayā nahīñ

sair-tan kī vādiyoñ kī to kiyā vo baar baar

ruuh kī gahrā.iyoñ meñ par utar paayā nahīñ

kaisī qurbat vasl kyā aur kyā qarār-e-jān-o-dil

vaqt ne sab kuchh diyā maiñ ne magar paayā nahīñ

kaisī ulfat pyaar kaisā aur kyā mehr-o-vafā

shahr meñ mere to aisī shai koī laayā nahīñ

apne beganon mein main ne farq kuchh paya nahin

is liye lab par koi shikwa kabhi laya nahin

aasman-e-dil pe baadal gham ka yun chhaya raha

han magar aankhon se main ne us ko barsaya nahin

KHush-gawari ka tassur aa gaya chehre pe yun

zaKHm jo dil par laga tha wo to bhar paya nahin

tum ne ghairon ke liye mujh se kiya jang-o-jadal

mere iKHlas-o-wafa ne tum ko taDpaya nahin

apni mahrumi ka main kyun kar karun shikwa bata

jaanta hun raat ka hota koi saya nahin

sair-tan ki wadiyon ki to kiya wo bar bar

ruh ki gahraiyon mein par utar paya nahin

kaisi qurbat wasl kya aur kya qarar-e-jaan-o-dil

waqt ne sab kuchh diya main ne magar paya nahin

kaisi ulfat pyar kaisa aur kya mehr-o-wafa

shahr mein mere to aisi shai koi laya nahin