apne bojh se TuT raha hun

apne bojh se TuuT rahā huuñ

maiñ bhī kāñch kā ik TukḌā huuñ

koī kahānī yaad nahīñ hai

raddī kāġhaz bech chukā huuñ

ziist ne apne par phailā.e

ret ke sahrāoñ meñ khaḌā huuñ

apnī baat kahūñ to kyūñkar

un kī bātoñ meñ uljhā huuñ

sab miTTī ke saudāgar haiñ

jin ke bhī hāthoñ meñ bikā huuñ

mujh se tark-e-ta.alluq kar lo

maiñ andar se TuuT chukā huuñ

tum hī becho tum hī ḳharīdo

sūd-o-ziyāñ se lā-parvā huuñ

laakh sañvāro laakh bigāḌo

vaisā rahūñgā maiñ jaisā huuñ

nuqta ek huuñ 'īraj' lekin

samtoñ hī samtoñ meñ baTā huuñ

apne bojh se TuT raha hun

main bhi kanch ka ek TukDa hun

koi kahani yaad nahin hai

raddi kaghaz bech chuka hun

zist ne apne par phailae

ret ke sahraon mein khaDa hun

apni baat kahun to kyunkar

un ki baaton mein uljha hun

sab miTTi ke saudagar hain

jin ke bhi hathon mein bika hun

mujh se tark-e-talluq kar lo

main andar se TuT chuka hun

tum hi becho tum hi KHarido

sud-o-ziyan se la-parwa hun

lakh sanwaro lakh bigaDo

waisa rahunga main jaisa hun

nuqta ek hun 'iraj' lekin

samton hi samton mein baTa hun