apne chehre pe sharafat ko sajae rahiye

apne chehre pe sharāfat ko sajā.e rahiye

saaf kapḌoñ meñ har ik aib chhupā.e rahiye

sach ko sach kahne ke anjām se Dar lagtā hai

is liye jhuuT kaleje se lagā.e rahiye

chashm-e-sāqī kī ināyat kā bharam rakhnā hai

be-piye bazm meñ hangāma machā.e rahiye

apne qātil ko kabhī zahmat-e-tash.hīr na deñ

apnā sar apne hī neze pe uThā.e rahiye

sub.h gar hogī to pahchān liye jā.eñge

sho.abde shab ke añdhere meñ dikhā.e rahiye

un ke kūche meñ jo jaanā hai to hushiyār raheñ

barf ko aag ke sho.aloñ se bachā.e rahiye

lākhoñ ilzām se bachne kā salīqa ye hai

mujh ko ilzām kī suulī pe chaḌhā.e rahiye

dard āñkhoñ se Tapak jā.egā aañsū ban kar

laakh hoñToñ pe tabassum ko sajā.e rahiye

aap bardāsht na kar pā.eñge 'nāzim' kā vajūd

ye jo dīvāna banā hai to banā.e rahiye

apne chehre pe sharafat ko sajae rahiye

saf kapDon mein har ek aib chhupae rahiye

sach ko sach kahne ke anjam se Dar lagta hai

is liye jhuT kaleje se lagae rahiye

chashm-e-saqi ki inayat ka bharam rakhna hai

be-piye bazm mein hangama machae rahiye

apne qatil ko kabhi zahmat-e-tashhir na den

apna sar apne hi neze pe uThae rahiye

subh gar hogi to pahchan liye jaenge

shoabde shab ke andhere mein dikhae rahiye

un ke kuche mein jo jaana hai to hushiyar rahen

barf ko aag ke shoalon se bachae rahiye

lakhon ilzam se bachne ka saliqa ye hai

mujh ko ilzam ki suli pe chaDhae rahiye

dard aankhon se Tapak jaega aansu ban kar

lakh honTon pe tabassum ko sajae rahiye

aap bardasht na kar paenge 'nazim' ka wajud

ye jo diwana bana hai to banae rahiye