apne dukhon ka humne tamasha nahin kiya

apne dukhoñ kā ham ne tamāsha nahīñ kiyā

faaqe kiye magar kabhī shikva nahīñ kiyā

be-ghar hue tabāh hue dar-ba-dar hue

lekin tumhāre naam ko rusvā nahīñ kiyā

go ham charāġh-e-vaqt ko raushan na kar sake

par apnī zaat se to añdherā nahīñ kiyā

is par bhī ham luTāte rahe daulat-e-yaqīñ

ik pal bhī jis ne ham pe bharosa nahīñ kiyā

us shaḳhs ke liye bhī duā go rahe haiñ ham

jis ne hamāre haq meñ kuchh achchhā nahīñ kiyā

hālāñki ehtirām sabhī kā kiyā magar

ham ne kisī ko qibla-o-ka.aba nahīñ kiyā

'tāriq-matīn' khāte rahe umr-bhar fareb

lekin kisī ke saath bhī dhokā nahīñ kiyā

apne dukhon ka hum ne tamasha nahin kiya

faqe kiye magar kabhi shikwa nahin kiya

be-ghar hue tabah hue dar-ba-dar hue

lekin tumhaare nam ko ruswa nahin kiya

go hum charagh-e-waqt ko raushan na kar sake

par apni zat se to andhera nahin kiya

is par bhi hum luTate rahe daulat-e-yaqin

ek pal bhi jis ne hum pe bharosa nahin kiya

us shaKHs ke liye bhi dua go rahe hain hum

jis ne hamare haq mein kuchh achchha nahin kiya

haalanki ehtiram sabhi ka kiya magar

hum ne kisi ko qibla-o-kaba nahin kiya

'tariq-matin' khate rahe umr-bhar fareb

lekin kisi ke sath bhi dhoka nahin kiya