اپنے دکھوں کو سوچ کے روتا ہے آدمی

اپنے دکھوں کو سوچ کے روتا ہے آدمی

ورنہ کہاں یہ پلکیں بھگوتا ہے آدمی

اول ہمیشہ خود کو سمجھتا ہے کیا کرے

جب آدمی کے سامنے ہوتا ہے آدمی

اپنے نصیب کے لیے ہے خود ہی ذمہ دار

کرموں کی اپنے پوٹلی ڈھوتا ہے آدمی

جیون کسی نے اپنا مکمل کہاں جیا

آدھے سے کچھ زیادہ تو سوتا ہے آدمی

دھڑکن کے موتیوں کو ہی سانسوں کی ڈور میں

ہر وقت اپنے آپ پروتا ہے آدمی

راہوں میں گل ملیں گے کہ کانٹے بچھے ہوئے

اگتی وہی ہے فصل جو بوتا ہے آدمی

جاتا کہاں ہے یہ تو کسی کو خبر نہیں

حشمتؔ جہاں سے جب جدا ہوتا ہے آدمی