apne dukhon ko soch ke rota hai aadmi

apne dukhoñ ko soch ke rotā hai aadmī

varna kahāñ ye palkeñ bhigotā hai aadmī

avval hamesha ḳhud ko samajhtā hai kyā kare

jab aadmī ke sāmne hotā hai aadmī

apne nasīb ke liye hai ḳhud hī zimma-dār

karmoñ kī apne poTlī Dhotā hai aadmī

jīvan kisī ne apnā mukammal kahāñ jiyā

aadhe se kuchh ziyāda to sotā hai aadmī

dhaḌkan ke motiyoñ ko hī sāñsoñ kī Dor meñ

har vaqt apne aap pirotā hai aadmī

rāhoñ meñ gul mileñge ki kāñTe bichhe hue

ugtī vahī hai fasl jo botā hai aadmī

jaatā kahāñ hai ye to kisī ko ḳhabar nahīñ

'hashmat' jahāñ se jab judā hotā hai aadmī

apne dukhon ko soch ke rota hai aadmi

warna kahan ye palken bhigota hai aadmi

awwal hamesha KHud ko samajhta hai kya kare

jab aadmi ke samne hota hai aadmi

apne nasib ke liye hai KHud hi zimma-dar

karmon ki apne poTli Dhota hai aadmi

jiwan kisi ne apna mukammal kahan jiya

aadhe se kuchh ziyaada to sota hai aadmi

dhaDkan ke motiyon ko hi sanson ki Dor mein

har waqt apne aap pirota hai aadmi

rahon mein gul milenge ki kanTe bichhe hue

ugti wahi hai fasl jo bota hai aadmi

jata kahan hai ye to kisi ko KHabar nahin

'hashmat' jahan se jab juda hota hai aadmi