اپنے دشمن کو بھی جو شخص دعا دیتا ہے

اپنے دشمن کو بھی جو شخص دعا دیتا ہے

تو اسے اس کا نمک کھا کے دغا دیتا ہے

سات تالوں میں بھی پہچان نہیں چھپتی ہے

تیرا لہجہ ترے شجرے کا پتہ دیتا ہے

یہ روایت بھی روایت ہی ہوئی ہے ثابت

عشق معشوق کا ہر عیب چھپا دیتا ہے

کب کہاں کون سا کردار ادا کرنا ہے

وقت ہی وقت پہ یہ کھیل سکھا دیتا ہے

کبھی خاموشی کو خاموش کرا کر دکھلائے

شور دریا مری آواز دبا دیتا ہے

یوں تو پیسے کی کوئی ذات نہیں ہے لیکن

ایک روتے ہوئے بچے کو ہنسا دیتا ہے

ایسا کچھ لوگ بھی کرتے ہیں کئی بار سعودؔ

جیسے تیزاب درختوں کو سکھا دیتا ہے