apne gham ka mujhe kahan gham hai

apne ġham kā mujhe kahāñ ġham hai

ai ki terī ḳhushī muqaddam hai

aag meñ jo paḌā vo aag huā

husn-e-soz-e-nihāñ mujassam hai

us ke shaitān ko kahāñ taufīq

'ishq karnā gunāh-e-ādam hai

dil ke dhaḌkoñ meñ zor-e-zarb-e-kalīm

kis qadar is habāb meñ dam hai

hai vahī 'ishq zinda-o-jāved

jise āb-e-hayāt bhī sam hai

is meñ Thahrāv yā sukūn kahāñ

zindagī inqalāb-e-paiham hai

ik taḌap mauj-e-tah-nashīñ kī tarah

zindagī kī binā-e-mohkam hai

rahtī duniyā meñ 'ishq kī duniyā

na.e 'unvān se munazzam hai

uThne vaalī hai bazm maazī kī

raushnī kam hai zindagī kam hai

ye bhī nazm-e-hayāt hai koī

zindagī zindagī kā mātam hai

ik muamma hai zindagī ai dost

ye bhī terī adā-e-mub.ham hai

ai mohabbat tū ik azaab sahī

zindagī be tire jahannam hai

ik talātum sā rañg-o-nik.hat kā

paikar-e-nāz meñ damā-dam hai

phirne ko hai rasīlī nīm-nigāh

āhū-e-nāz mā.il-e-ram hai

ruup ke jot zer-e-pairāhan

gulsitāñ par ridā-e-shabnam hai

mere siine se lag ke so jaao

palkeñ bhārī haiñ raat bhī kam hai

aah ye mehrbāniyāñ terī

shādmānī kī aañkh pur-nam hai

narm o doshīza kis qadar hai nigāh

har nazar dāstān-e-maryam hai

mehr-o-mah shola-hā-e-sāz-e-jamāl

jis kī jhankār itnī maddham hai

jaise uchhle junūñ kī pahlī shaam

is adā se vo zulf barham hai

yuuñ bhī dil meñ nahīñ vo pahlī umang

aur terī nigāh bhī kam hai

aur kyuuñ chheḌtī hai gardish-e-charḳh

vo nazar phir ga.ī ye kyā kam hai

rū-kash-e-sad-harīm-e-dil hai fazā

vo jahāñ haiñ 'ajīb 'ālam hai

diye jaatī hai lau sadā-e-'firāq'

haañ vahī soz-o-sāz kam kam hai

apne gham ka mujhe kahan gham hai

ai ki teri KHushi muqaddam hai

aag mein jo paDa wo aag hua

husn-e-soz-e-nihan mujassam hai

us ke shaitan ko kahan taufiq

'ishq karna gunah-e-adam hai

dil ke dhaDkon mein zor-e-zarb-e-kalim

kis qadar is habab mein dam hai

hai wahi 'ishq zinda-o-jawed

jise aab-e-hayat bhi sam hai

is mein Thahraw ya sukun kahan

zindagi inqalab-e-paiham hai

ek taDap mauj-e-tah-nashin ki tarah

zindagi ki bina-e-mohkam hai

rahti duniya mein 'ishq ki duniya

nae 'unwan se munazzam hai

uThne wali hai bazm mazi ki

raushni kam hai zindagi kam hai

ye bhi nazm-e-hayat hai koi

zindagi zindagi ka matam hai

ek muamma hai zindagi ai dost

ye bhi teri ada-e-mubham hai

ai mohabbat tu ek azab sahi

zindagi be tere jahannam hai

ek talatum sa rang-o-nikhat ka

paikar-e-naz mein dama-dam hai

phirne ko hai rasili nim-nigah

aahu-e-naz mail-e-ram hai

rup ke jot zer-e-pairahan

gulsitan par rida-e-shabnam hai

mere sine se lag ke so jao

palken bhaari hain raat bhi kam hai

aah ye mehrbaniyan teri

shadmani ki aankh pur-nam hai

narm o doshiza kis qadar hai nigah

har nazar dastan-e-maryam hai

mehr-o-mah shola-ha-e-saz-e-jamal

jis ki jhankar itni maddham hai

jaise uchhle junun ki pahli sham

is ada se wo zulf barham hai

yun bhi dil mein nahin wo pahli umang

aur teri nigah bhi kam hai

aur kyun chheDti hai gardish-e-charKH

wo nazar phir gai ye kya kam hai

ru-kash-e-sad-harim-e-dil hai faza

wo jahan hain 'ajib 'alam hai

diye jati hai lau sada-e-'firaq'

han wahi soz-o-saz kam kam hai